පුවත්

වත්මන් රජය ගෙන යන ඩිජිටල් රාජ්‍යකරණය ප්‍රතිපත්තිය තවත් ඉදිරියට ගෙන යමින් රාජ්‍ය පරිපාලන අමාත්‍යාංශය යටතේ පවතින සංචාරක බංගලා හා නිවාඩු නිකේතන මාර්ගගත ක්‍රමයට වෙන්කර ගැනීමේ පහසුකම එළිදැක්වීම රාජ්‍ය පරිපාලන, පළාත් සභා හා පළාත් පාලන අමාත්‍ය මහාචාර්ය චන්දන අබයරත්න මහතාගේ ප්‍රධානත්වයෙන් ඊයේ (29) දින අමාත්‍යාංශ ශ්‍රවණාගාරයේදී සිදුවිය.

www.pubad.gov.lk ඔස්සේ රාජ්‍ය පරිපාලන, පළාත් සභා හා පළාත් පාලන අමාත්‍යාංශය නිල වෙබ් අඩවියට පිවිසීමෙන් මෙම පහසුකම ලබා ගත හැකි ය.

මෙහිදී අදහස් දැක්වූ අමාත්‍යවරයා පැවසූයේ, තම අතේ ඇති ජංගම දුරකථනයෙන් නිවාඩු නිකේතනක් වෙන් කර ගැනීමේ අවස්ථාව උදාකර දීම අමාත්‍යාංශයේ අපේක්ෂාව බවත්, ඉදිරියේ දී ජනතාවගේ ප්‍රතිචාර සමඟ අවශ්‍යතා අනුව වෙනස්කම් සිදු කරමින් වත්මන් රජයේ ඩිජිටල් ක්‍රියාදාමය ශක්තිමත් කරමින් ජනයාට අවශ්‍ය සේවාවන් සැලසීමට අමාත්‍යාංශය කටයුතු කරන බවත් ය.

මෙම අවස්ථාවට අමාත්‍යාංශ ලේකම් එස්. ආලෝකබණ්ඩාර මහතා ඇතුළු අමාත්‍යාංශයේ මාණ්ඩලික නිලධාරීන් රැසක් සහභාගී වී සිටියහ.

-ස්වදේශ කටයුතු මාධ්‍ය ඒකකය-

අදාල ලිපිය

රාජ්‍ය සේවය ඩිජිටල් කරනය කර නව මාවතකට යොමු කිරිම වත්මන් රජයේ අරමුණ බව රාජ්‍ය පරිපාලන,  පළාත් සභා හා පළාත් පාලන අමාත්‍යා ආචාර්ය ඒ.එච්.එම්.එච්  අබයරත්න මහතා කියා සිටියේය.

අමාත්‍යවරයා මේ බව සඳහන් කළේ  රාජ්‍ය පරිපාලන, පළාත් සභා හා පළාත් පාලන අමාත්‍යාංශයේ ස්වදේශ කටයුතු අංශයේ රාජ්‍ය නිලධාරීන්ට ඩිජිටල් අත්සන (Digital Signature ) හඳුනාදීමේ අවස්ථාවට 2025.09.15 දින එක්වෙමින්.ජනතාව අපේක්ෂා කරන කාර්යක්ෂම රාජ්‍ය සේවයක් ඇති කිරීම තම අරමුණු බවත් ග්‍රාම නිලධාරිවරයා දක්වා මෙම නව තාක්ෂණය ගෙන යා යුතු බවත් අමාත්‍යවරයා වැඩිදුරටත් කියා සිටියේය.

රාජකාරී කටයුතු පහසුව සහ කාර්යක්ෂමව කිරීම සඳහා 2006 අංක 19 දරන ඉලෙක්ට්‍රොනික ගනුදෙනු පනත පරිදි ස්වදේශ කටයුතු අංශයේ දිස්ත්‍රික් ලේකම් කාර්යාල සහ ප්‍රාදේශීය ලේකම් කාර්යාල තුල සිටින නිලධාරීන්ගේ අත්සන් ඩිජිටල් කරනය ක්‍රියාවලිය  මෙහිදී ආරම්භ විය.

ඉලෙක්ට්‍රොනික ගනුදෙනු පනතේ විධිවිධාන ප්‍රකාරව LankaPay ආයතනය ඩිජිටල් අත්සන සහිතක කිරීමේ අධිකාරිය වේ. මේ අනුව ලිපි මගින් කටයුතු කිරීමේදී ඇතිවෙන ප්‍රමාදයන් වළක්වා ගැනීමට හැකිවන සේම වඩාත් කාර්යක්ෂම හා ඵලදායි සේවාවක් සලසා ගත හැකියි.

මෙම අවස්ථාව සඳහා රාජ්‍ය පරිපාලන,  පළාත් සභා හා පළාත් පාලන අමාත්‍යාංශයේ ලේකම් එස්. ආලෝකබණ්ඩාර , ස්වදේශ කටයුතු අංශයේ අතිරේක ලේකම්වරුන් වන චිත්‍රා තිලකරත්න, ආචාර්ය රෝෂිණී දිසානයක, ඒ.ජී. නිශාන්ත , ධම්මික මුතුගල,   ඔමාලි විමලරත්න,  මෙන්ම  ප්‍රධාන මුල්‍ය නිලධාරී ජේ .ඩී.ඒ. පී ජයසිංහ, අධ්‍යක්ෂ ජෙනරාල් ඉංජිනේරු යූ. එල්.ඒ. නසාර්, කොළඹ දිස්ත්‍රික් ලේකම් ප්‍රසන්න ගීගනගේ යන මහත්ම මහත්මීන් සහ ස්වදේශ කටයුතු අංශයේ මාණ්ඩලික  නිධාරීන් රැසක් එක සිටියහ.

-ස්වදේශ කටයුතු මාධ්‍ය ඒකකය-